يوميات محامى تحت التمرين

تخرجت من الجامعة سنة ٢٠٠٨ وعملت محاميا ( تحت التمرين )

 نظير راتب شهري ١٥٠ جنيه ( نعم مائه وخمسون جنيه فقط لا غير ) ... والحقيقة المبلغ ده وقتها كان عادي ممكن تدفعه في أكلة في مطعم ، وده اللي كنت بعمله بالفعل ، يتصرفوا في يوم ، وبقية الايام بصرف من جيبي. 

اول اسبوع ليا في المكتب ، استاذي اداني قضية في جنح مستأنف وقاللي اكتب فيها مذكره ، ودي كانت اول مره اكتب فيها مذكره في حياتي. 

جبت شوية الكتب ( اللي كانت عندي وقتها ) وفضلت ابحث وادور ، وخدت مني قرابة ثلاث ساعات.

تاني يوم عرضتها عليه ، تناقشنا فيها وصححلي بعض الحاجات ، ونبهني ان احكام محكمة النقض اللي انا مستشهد بيها بعيدة شوية عن الموضوع ، ولازم اشوف احكام نقض مباشرة وتمس الموضوع بشكل اكبر. 

وفضلنا علي هذا الحال طوال فترة تمريني ، اكتب مذكرات في كافة القضايا ، وطبعا احضر جلسات ، والشغل الاداري احيانا ،رغم اني كنت بتهرب منه ، على عكس زميلي الاخر اللي كان عاشق لانهاء الشغل الاداري ، وبيقول ابعدوني عن موضوع كتابة المذكرات ده. 

• لو نظرت للقصه دي بعين السخط ، هقول استاذي بيستغلني ، قضيه ياخد فيها خمسين الف جنيه وانا اللي كاتب كل حرف فيها ، وفي الاخر اخد ١٥٠ ؟ 

• ده لو فواعلي بياخد ١٥٠ جنيه في اليوم ، ده استغلال !!

ولو نظرت ليها بعين متبصره هقول ، فترة التمرين في حد ذاتها ، غايه ام وسيلة ؟

لو هي الغاية ونهاية الطموحات ، يبقى اسيبه طبعا ، وفيه مكاتب كمان كانت بتدي الف جنيه ( وقتها ) ، وأفضل اتنقل من مكتب لمكتب من اللي بيدفع اكتر ، لحد ما الاقي عندي اربعين سنة وراضي اخد الفتات. 

اما لو مدرك ان فترة التمرين وسيلة ، وفي نفس الوقت مش راضي بالراتب ، يبقي من الحكمة اني احاول اختصر فترة التمرين دي بقدر الامكان ، ازاي ؟

يعني اللي اتعلمه في شهر احاول اتعلمه في اسبوع ، اشتغل واشوف القضايا في مكتب استاذي وهي بتخسر قدام عيني ، واجيب الحكم واشوف القاضي رد ازاي علي المذكره اللي انا كاتبها ، بتعلم في قضايا الناس ببلاش. 

واما القضيه بتخسر ، استاذي اللي خسر ، مش انا.

وفي المقابل لو القضيه كسبت ، برضه استاذي اللي كسب مش انا. 

......

* يعني انت تقصد ان المحامي يشتغل ب ١٥٠ جنيه في الشهر ؟

قطعا وحتما لا اقصد ذلك ، لكن انا بتكلم عن تجربتي الشخصيه. 

* امال ايه معنى البوست ؟

معناه انك طالما مش بتاخد راتب كافي ( وده اكيد ) ، يبقي التصرف الحكيم انك تحاول تتعلم بسرعة وتستقل ، وبدل ما استاذك بيديك الف جنيه طول الشهر علي خمسين قضيه بتحضر فيهم ، انت لوحدك هتاخد الالف جنيه في قضيه واحده هتحضر فيها لو استقليت. 

* لا بس المفروض الرواتب تزيد عن كدا ؟

اكيد المفروض تزيد ، لكن عمرها ما هتوصل للدرجة اللي انت متخيلها ، لان الموضوع كله اساسا مؤقت ، بالضبط زي الموظف المؤقت بياخد راتب قليل جدااا. 

* بس فيه مكاتب بتدي عشر الاف جنيه في الشهر ؟

بص يا سيدي ، المبالغ دي بتكون في مكاتب المحاماة الدوليه ، زي مكتب شلقاني مثلا وغيره ، وده ليه وضع تاني ، وصعب جدااا اصلا انت تتعين هناك ، بيحتاجوا لغة واختبارات وقصة طويله. 

اما مكاتب كبار المحامين زي مرتضي منصور مثلا ، اعرف حد كان بيشتغل معاه راتبه مكنش مكمل الف جنيه ، ومكملش معاه ست شهور وسابه لانه مكنش بيتعلم حاجة. 

وانت بذمتك لما تستقل وتفتح مكتب هتدي رواتب كام ؟ جاوب وخليك امين مع نفسك. 

هل لو خدت مائه الف في قضيه هتدي المحامي اللي معاك عشر الاف ؟ طب وبقية المحامين اللي عندك هتعمل معاهم كدا ؟

قطعا عمرك ما هتعمل كدا ، لان ببساطه المائه الف دي وقتها يدوب هتكون مكفية مصاريفك ، لان كل ما دخلك بيزيد نفقاتك بتزيد ، دلوقتي بتجيب بدله بالف جنيه ، لو معاك فلوس غصبن عنك هتجيب بدله بعشر الاف وهكذا ، ده غير مصاريف بيتك واولادك ومدارسهم ، ده غير انه اساسا نظرتك للمحامين المتدربين في مكتبك ، انهم ( بيتدربوا ) يعني هدفهم الخبره مش الفلوس ، فيدوب هتديهم الفلوس اللي تكفيهم من وجهه نظرك ، حتي لو كانت في حقيقة الامر غير كافية. 

......

وعلي هامش البوست ، لما سجلت دكتوراة ، الدكتور طلب مني مراجع بالالاف الجنيهات ، ووسط الكلام قاللي ، انت فاكر حرف ( د ) اللي هيسبق اسمك ده هييجي بالساهل؟ ده هيفتحلك باب كبير للعلم والفلوس ، لازم تدفع مقابله دلوقتي. 

ولما فكرت في كلامه لقيت كلامه صحيح ، لا تعطيني سمكة ولكن علمني كيف اصطادها.

ونرجع نقول لو حضرتك شايف ان عندك المؤهلات الكافيه انك تاخد راتب خمس الاف وعشر الاف ، فأديني رشحتلك مكتبين من مكاتب المحاماة ، الشلقاني وذو الفقار وغيرهم كتير من المكاتب الدوليه ، راتبك هناك هيكون بالدولار ، وازيد من راتب مدير نيابه ، بس هل هتنجح في الاختبار وهتتقبل ؟
بقلم المحامي محمد الصادق